الحضور الوجوبي والجوازي للمتهم

 ازاي تعرف ان موكلك لازم يحضر بنفسه في المحكمة او انه مش لازم يحضر
وانه يجوز انك تحضر عنه بتوكيل
الموضوع دا مهم جدا لأن عدم معرفتك بيه بيترتب عليها انك ممكن تلاقي نفسك في جلسة (الحضور فيها وجوبي) وانت مش معاك المتهم والقاضي يحرجك ويرفض سماع مرافعتك ويحكم غيابي على موكلك
( أ ) محكمةالجنح
ببساطة الجنح اللي مفيهاش كفالة والحكم فيها بيكون واجب النفاذ بمجرد صدوره ؛ دي لازم المتهم يحضر المحاكمة بنفسه ولا يجوز الحضور عنه بتوكيل
طيب ايه هي الجنح دي اللي مفيهاش كفالة والحكم فيها بيكون واجب النفاذ ..؟!
الجنح دي هي : –
( السرقة – الآداب – التسول – حيازة سلاح – المخدرات )
خلي بالك اني بتكلم عن الجنح
يعني المخدرات فيها ( جنح وجنايات ) فلما اقول المخدرات يبقى الجنح فقط
يعني في اي جنحة منهم لازم حضرتك تخلي المتهم يحضر بنفسه في المحكمة
إنما اي جنحة غير الجنح دي مش لازم المتهم يحضر بنفسه إنما يجوز انك تحضر عنه بتوكيل
زي جنح ( النصب – الشيكات …. )
(ب) محكمةجنح_مستأنف
مبدئيا كدا اذا كانت الجنحة اقيمت امام محكمة الجنح (جنحة غير مباشرة) يعني محضر في القسم او في النيابة وصدر فيها حكم بالحبس ؛ في الحالة دي لازم المتهم يحضر بنفسه قدام محكمة جنح مستأنف .‍
والكلام دا ينطبق على كل الجنح مهما كان نوعها
ودا ليه ,, لأن الجنح الغير مباشر الصادر فيها حكم بالحبس لما تيجي محكمة جنح مستأنف تحكم فيها بيكون حكمها واجب النفاذ مجرد صدوره.
طيب اذا كانت الجنحة اقيمت امام محكمة الجنح
(جنحة مباشرة) في الحالة دي مش لازم المتهم يحضر قدام جنح مستأنف حتى اذا كان حكم أول درجة بالحبس وحتى اذا كانت الجنحة من الجنح اللي الحضور فيها وجوبي قدام محكمة الجنح
مش لازم يحضر المتهم ويجوز انك تحضر عنه بتوكيل
والكلام دا ينطبق على كل الجنح مهما كان نوعها
معلومة مهمة : في حالة صدور حكم اول درجة بالبراءة في جنحة الحضور فيها وجوبي ؛ ثم استأنفت النيابة الحكم بيكون حضور المتهم وجوبي امام جنح مستأنف
انت كمحامي في الحالة دي من الأفضل ليك ان موكلك مايحضرش
لأنه اذا قامت جنح مستانف بتعديل الحكم وحكمت بالحبس يبقى الحكم هيتنفذ على موكلك
فالافضل انه ميحضرش لأن حكم جنح مستأنف قد يصدر بتأييد حكم البراءة أو قد يصدر حكم بالحبس غيابي ويكون من حقك تعمل معارضة استئنافية
أهمية الموضوع دا :-
ان حضرتك اذا كنت وكيل المجني عليه الافضل ليك لما تيجي تعمل جنحة تعملها غير مباشرة علشان في الحالة دي حضور المتهم وجوبي قدام محكمة جنح مستأنف ودا بيمثل ضغط عليه خصوصا في الجنح اللي بيجوز فيها الصلح
(مش هقولك ليه .. استنتج بنفسك)
و اذا كنت وكيل المتهم عليك انك تعرف هل يجوز حضورك بتوكيل عن موكلك ولا لازم هو يحضر بنفسه في المحكمة .

                 مؤسسة حورس للمحاماه والاستشارات القانونيه

الخدمات التي تقدمها المؤسسه :
استشارات في القضايا الجنائية – القضايا التجارية – القضايا المدنية – القضايا العمالية – قضايا الأحوال الشخصية – قضايا الأجانب في مصر – قضايا المصريين في الخارج – استشارات في الزواج من الأجانب – نقدم لكم كافة الدعم القانوني ونوصل الخدمة القانونية لكم بكافة الطرق المتاحة – نحن نقوم بتوثيق الزواج العرفي وإثباته لدى القضاء وتصحيح وضعه.
هاتف الاستشارات القانونية

مؤسسة حورس للمحاماه والاستشارات القانونيه

للتواصل

من داخل مصر                                                   01129230200

من خارج مصر  (واتس اب)                              00201129230200