سراب الهجرة السهلة الى امريكا

انا مش خبير في شؤون الهجرة لامريكا انا متخصص في توثيق عقود زواج الاجانب، بس انا عايز اشاركم احد اشهر الاسئلة الي بتيجي الموقع والخاصة بالسفر الى المريكا للهجرة والعيش والعمل والاستقرار. كل الي مكتوب ده اجتهاد شخصي يحتمل الخطأ والصواب. أرحب طبعا بجميع التعليقات من ذوي الخبرة في الموضوع.

على حد علمي البسيط في موضوع الهجرة لامريكا ده، بيكون عن طريق ٣ حاجات:

 ١- لوتري الجرين كارد

الجرين كارد دة بيسمح ليك بالاقامة والدراسة والعمل بشكل قانوني. كل سنة امريكا بتعمل يناصيب على الانترنت، وسمعت ان الي بيقدم علية في مصر مليون واحد كل سنة وبياخدوا ٥ آلاف فقط. لو كسبت، بتسافر تدرس او تشتغل وبعد عدة سنوات واجرائات كتيرة بتاخد الجنسية.
طبعا دي تعتبر اسهل طريقة لانها بتعتمد على الحظ بشكل اساسي. لا تحتاج مؤهلات ولا دراسات. بتدخل على الموقع وتكتب بعض البيانات وبتنتظر النتيجة. .

٢- الدراسة في امريكا 

اولا بتعطيك فرصة انك تشتغل بشكل رسمي حوالي ٢٠ ساعة في الاسبوع اثناء فترة دراستك. بتخليك تقدر تعيش حياة  طبيعية بشكل مؤقت في امريكا. ثانيا بعد ما تخلص دراسة معاك تصريح تشتغل لمدة سنة. ثالثا، لو الشركة مبسوطة من شغلك، ممكن تعملك SPONSORSHIP وتغير التاشيرة بتاعتك من تاشيرة زيارة او دراسة الى تاشيرة عمل. بعد كذا سنة بتبدأ في اجرائات التقديم على الجرين كارد الي بتاخد كذا سنة، وبعد كدة بتقدم على اجرائات الجنسية وبتاخد كمان كذا سنة.

يا ريت الي عمل الموضوع يكتب لينا في التعليقات ملخص للاجرائات. اكرر، الي عمل كدة فعلا ونفذ. 

طبعا مش هتروح تقدم على كورس انجليزي تدرسه في امريكا علشان تلاقي شغل بعد كدة وتقدر تستمر في العمل هناك. لازم تكون طبيعة الشغل طبيعة خاصة وعليها طلب كبير. يعني مش هينفع تروح تشتغل في مطاعم مثلا وهتنتظر انه يجيب ليك تأشيرة عمل علشان تستمر.ل لان العمل في مطاعم لا يحتاج مؤهلات خاصة. لازم يكون دراستك وعملك ذو تخصص ليه احتياج هناك. دكتور او مهندس في تخصصات مطلوبة. لازم تدرس سوق العمل قبل ما تقدم على دراسة (جامعة، ماجستير مثلا) علشان تعرف اذا كنت هتعرف تلاقي وظيفة ولا لأ بعد ما تخلص دراستك.

معنديش اي خبرة في الدراسة هناك علشان لم ادرس هناك قبل كدة

٣- السفر السياحي، الهروب وكسر التأشيرة، الجواز للحصول على الجنسية

نظرا طبعا لظروفنا الاقتصادية السيئة، الطريقة دي اكتر حاجة بيحلم بيها الكثير من الشباب دلوقتي. اقدم على تأشيرة سياحة، اسافر واكسر التأشيرة واهرب هناك، وبعدين اتجوز واحدة وازبط ورقي واخد الجنسية واعيش ملك.

طبعا احنا عارفين قد ايه تأشيرة امريكا صعبة للشباب الصغير الى ورقه ودراسته وموقفه المادي لا يقنع موظف السفارة انه ناوي يسافر ويرجع تاني. افترضنا انك الحمدلله قدرت واخدت التأشيرة …. هتسافر بقى تحقق طموحك وتبدأ الحياة الوردية. خليني احكي ليكم عن بعض المشاهدات والحاجات الي سمعتها من اشخاص مصريين في امريكا، وهكون مبسوط اكتر لما اسمع قصص منكم بخصوص الموضوع ده.

• في نيويورك على سبيل المثال، الي بيوافق على التشغيل الغير قانوني هم المصريين او العرب، مطاعم او محلات بتاعتهم. وعلشان هو عارف انك غير قانوني، بيدفعلك نص ما تستحقه من مرتب. على حسب ما سمعت من واحد هناك ممكن يوصل ٤٠٠ دولا في الاسبوع.

• جميع الجنسيات المهاجرة امريكا بتحتضن الهاربين من جنسياتهم. يعني المكسيسكيين بيشغلوا ميكسيكيين هربانيين. الصينين بيشغلوا صينيين هربانيين. ممكن تلاقي طبعا حاجات غير قانونية عند ناس تانية، انت وحظك.

• الاقامة طبعا بتكون في شقق مشتركة كبيرة، ٥ او ١٠ في شقة واحدة. ممكن تكلفة الاقامة والمعيشة ١٠٠-٢٠٠ دولار في الاسبوع. كل واحد ومقدرته.

• علشان انت بتعيش بشكل غير قانوني، متهرب من العدالة، لو عيان مش هتعرف تروح مستشفى تتعالج لان العلاج في امريكا غااااالى جدا. لو اتسرقت مش هتعرف تروح القسم تعمل بلاغ حتى خوفا من القبض عليك.

• لا هتعرف تدرس ولا هتعرف تشتغل حاجة في تخصصك ولا تشتري اي حاجة ولا تفتح حساب في بنك حتى لانك مقيم بشكل غير قانوني. هتفضل عايش كدة في الظل لحد ما امورك تكون قانونية.

• نيجي بقى لمربط الفرس، العلاج السحري الي هيحل كل المشاكل دي ويخلي الدنيا تروق وتحلى … والي فهمت من رسائل ناس كتيرة انها حاجة مش شايلين همها، المهم يدخلوا ويوصلوا والموضوع ده بالنسبة ليهم سهل جدا …… انا دلوقتي في امريكا، اتجوز بقى علشان ازبط اموري … للأسف الموضوع ده صعب جدا جدا جدا …لعدة اسباب:

  1. ارجوك تطرد من دماغك الوساوس بتاعت “اجيبشن هيبوسني” وان المصريين جامدين اوي وان مفيش عندهم رجالة واحنا عيال مخلصة والتحشيش ده

  2. وضعك الغير قانوني قد لا يسمح ليك اجتماعيا بالارتباط بشكل سهل، لكنه ممكن طبعا يحصل. حتى لو واحدة مش امريكية اصلية، يعني واحدة هندية مكسيكية صينية او من بوركينا فاسو حتى، اكيد هتفضل حد من بني جنسها تتجوزه وتديله الجنسية.

  3. هنفترض ربنا وفقك واتعرفت على بنت امريكية بنت حلال، من اي اصول، في احتمال ان كل محاولاتك بالارتباط الجدي (الجواز) تفشل، حتى لو بتحبها وتعبدها عبادة، لانها ممكن تكون مقتنعة انك بتكدب وبتشتغلها علشان تتجوزها جواز مصلح، تزبط امورك وتاخد الجنسية. او طمعان فيها علشان لو اطلقتوا هتاخد نص فلوسها.

  4. لو فشلت في الارتباط والجواز بالشكل الرومانسي العاطفي، هتبدأ تتجه للجواز بالشكل القانوني فقط. كان زمان تروح لمحامي يجيب ليك واحدة تتجوزها على الورق فقط من غير ما تعرف شكلها، تدفع ليها فلوس قد كدة، وبعد شوية اجرائات تاخد الجنسية بعد كام سنة. بس ده كاااان زمااااان.

  5. دلوقتي علشان تتجوز واحدة بهدف الجنسية فقط، المحكمة بتخضعكم انتوا الاتنين للمراقبة والتفتيش المفاجئ على عنوان معيشتكم المشتركة. المحكمة كمان بتعمل تحقيق للتأكد من انك فعلا متجوزين وتعرف عنها كل حاجة. سكره كام في الشاي؟ بتشرب القهوة بلبن؟ مقاس الجزمة كام؟ لون ملابسها الداخلية ايه؟ واسئلة اكثر خدشا للحياء من كدة. علشان يتأكدوا انكم فعلا متجوزين بجد ومش عاملين كدة علشان حضرتك تاخد الجنسية. ولو في يوم اتعمل تفتيش مفاجئ وكنت نايم في الصالة وهي نايمة في الاوضة، المحكمة ممكن ترفض الطلب وترفض اكمالك لاجرائات الجنسية.

  6. الكارثة الكبرى بتحصل امتى بقى، انك تقع في واحدة نصابة اصلا. ممكن بعد ما تتجوزوا وتعيشوا سوا علشان تسبكها على المحكمة، وتاخد منك فلوس طبعا قد كدة، تبدأ تبتزك بقى بفلوس اكتر. هي عارفه انك محتاج ليها ومذلول ليها علشان تخلص اجرائات الجنسية. ممكن تهرب اصلا وتبدأ الرحلة دي من الاول تاني مع زوجة جديدة ومصاريف جديدة. اصدقاء ليا في نيوجيرسي قالولي ان في واحد يعرفوه بقاله ١٠ سنين اتجوز ٣ مرات علشان ياخد الجنسية وكل مرة ياخد خازوق ويتنصب عليه.

الموضوع فيها مخاطر كبيرة. بس قد تكون ظروف البعض مننا سيئة لدرجة انه عايز يروح امريكا باي شكل وخلاص، مستعد يعيش باقي حياته مع ٢٠ واحد في اوضة وانه يفضل هربان ولا ياخد جنسية ولا يتجوز ولا اي حاجة. ربنا يوفق الجميع.

دي كل معلوماتي عن الهجرة لامريكا … هبقى شاكر جدا لو م