التفتيش ~القبض ~الاستيقاف

التفتيش ~القبض ~الاستيقاف

يجوز لرجل الشرطه تفتيش المواطن فى حالتين فقط
. الحاله الاولى : لو كنت متلبس بجريمه من حقه يقبض عليك ويفتشك ..
الحاله التانيه: لو انت طالعلك اذن قضائى من النيابه او المحكمه ..
واحد يقولى اومال الكماين اللى بنشوف فيها الظباط بتنزل الناس وتفتشهم دول ايه ده عمل غير قانونى بالمره من حقه ان يبص فى العربيه لو كان الكمين معمول لضبط احد المجرمين ولو ملقاش المجرم فى الناس الموجوده مينفعش يفتشهم وبالنسبه للسواق وعربيته من حقه يفتش العربيه لو كان متبلغ عنها ويفتش السواق لو منطبق عليه حاله من الاتنين اللى احنا قولناهم غير كده كل حاجه باطله .. بالنسبه ليك انت كشخص راكب عربيتك الملاكى ومعاك رخصك سليمه مش من حقه يفتشك لان الحاجات الخاصه بيك بتاخد نفس الحصانه بتاعتك ومينفعش تتفتش الا فى حدود الحالات اللى قولنا عليها .

طيب اومال احنا بنلاقى الظابط ليه بينزل على القهاوى والكافتيريات ويسأل الناس على بطايقهم ؟ ده عمل غير قانونى برده ومن حقك تسأله ليه وتشوف الكارنيه بتاعه كظابط وده بنص الماده 24 مكرر اجراءات جنائيه ولو لقيت مايستدعى انك تطلع البطاقه طلعهالو عادى لكن انت كشخص مجرد مابتشوف البوكس وقف ونزل اصلا بتحاول تقوم تجرى واول مايسألك ع البطاقه بتدهالو وبتدعى ربنا مايخدكش لانك مش عارف حقك وادينى بعرفهولك اهو … الظابط ماهو الا مأمور ضبط قضائى يعنى عشان يعمل حاجه لازم يكون معاه اذن قضائى …

بس فيه حاجه اسمها الاستيقاف وده فى قانون الاجراءات الجنائيه فى الماده 24 اجراءات اللى ادت الحق لمأمور الضبط القضائى اللى هو الظباط وهكذا انهم يوقفو اى حد بس شرط انهم يوقفوه انه يضع نفسه محل شك وريبه يعنى يحط نفسه فى موقف يخلى الظابط يشك فيه يعنى زى واحد ماشى يلعب فى كوالين العربيات وبيبان العربيات ماهو كده الظابط هيشك فيه انه حرامى فهنا يستوقفه ويفتشه ويسأله عن بطاقته ولو اتمسك بحاجه هيسرى عليه شرط التلبس اللى احنا قولنا عليه فى الاول … يبقى المفروض انت كمواطن عارف حقوقك متخافش من الظابط واساله عايز بطاقتى ليه وبكل ذوق وادب فهمه انك فاهم حقك كويس هتلاقيه عاملك كويس وسابك ودور على غيرك مش فاهم عشان يقفله كام محضر ويبانو انهم شغالين…

طيب انا كمواطن الظابط فتشنى بالعافيه وخدنى ع القسم بالعافيه ومش عارف اعمل ايه … افضحه فى المكان اللى انت فيه واول ماتروح القسم حاول تعمل دوشه وتقابل المأمور وحاول تتصل على المحامى بتاعك او حد من قرايبك والمحامى عارف هيعمل ايه بالظبط … لكن الظابط لو شايفك فاهم عمره ما هيضركء انت كمواطن عرفت حقك متخافش من ظابط لو مد ايده عليك خدك بالعافيه عرفت هتعمل ايه لو انت فى كمين عرفت هتعمل ايه …. وانت كمحامى طبعا ليك حصانه وعلى فكره الحصانه بتاعتك قبل ماتكون القانون بتكون الحصانه بتاعتك هى شخصيتك لازم تكون شخصيتك جديره بالاحترام بينك وبين نفسك هتلاقى كل اللى قدامك هيحترمك لكن متددخلش القسم تزعق وتعلى صوتك كده انت بقيت زيهم بالظبط ..

انت الظابط اللى مينفذش ليك الطلب بتاعك اطلع ع النيابه خد التأشيره اللذيذه من وكيل النيابه ولا رئيس النيابه وهتروح تخليه يعملك اللى انت عايزه برده وكلامك هو اللى هيمشى طالما غير مخالف للقانون وكده تبقى انت دخلت محترم وخرجت محترم وثبتت شخصيتك فى المكان ده اينعم هو هيرازيك بعد كده وهيتخنق منك بس هيخاف يعمل معاك حاجه تانى الادب والاحترام هما حصانتك مش القانون خالص واتمنى ان التعامل بين المواطنين وضباط الشرطه يكون قائم على الاحترام المتبادل بينهم وكمان يكون شىء جميل لو تم التعاون بين المحامى وكيل النيابه والقاضى على سبيل العداله هيكون شىء جميل لان دول اجنحه العداله مينفعش جناح فيهم يقع ساعتها هتقع العداله بأكملها… وانا فى الفقره دى بتكلم عن قانون الاجراءات الجنائيه الثابت اما فى حاله الطوارىء من حق الظابط يفتشك وممكن يقبض عليك فى حالات الضروره القصوى بدون اشتباه ولا الكلام ده ولكن ده فى الحالات الحرجه