استشارات قانونيه مصريه , زواج وطلاق الاجانب, تأسيس الشركات في اسرع وقت واقل تكلفه , القضايا التجاريه ,كتابة توثيق عقود زواج عرفي شرعي , قضايا محكمة الاسره , تأسيس الشركات , تقنين اقامات الاجانب , القضاء الاداري , القضاء المدني , قضايا الجنايات والجنح

هل يعتبر اغلاق المنشأة اغلاقا كلياً او جزئياً فصلا تعسفيا ؟

232

هل يعتبر اغلاق المنشأة اغلاقا كلياً او جزئياً فصلا تعسفيا ؟ مثال … لو رحت شغلك في يوم و لقيت المصنع او الشركة مقفولة و بلغوك ان صاحب العمل قرر اغلاق المنشأة المصنع او الشركة و تسريح العمال … ايه وضعك القانوني و وضع صاحب العمل !!؟؟
الاجابة :- نظم قانون العمل الموحد رقم 12 لسنة 2003 نص في مواده من 196 و حتى المادة 198 حق صاحب العمل في اغلاق المنشأة و الزم القانون صاحب العمل بأنه يتقدم بطلب الى لجنة خاصة بالوزارة و الزمه باخطار العمال و المنظمة العمالية سواء كان الاغلاق كلي او جزئي او حتى تقليص لحجم و نشاط المؤسسة او المنشأة علشان يراعي حقوق العمال بالمنشأة او المؤسسة المملوكة له …

هل يعتبر اغلاق المنشأة اغلاقا كلياً او جزئياً فصلا تعسفيا ؟

يعني القانون بيقول انه لازم على صاحب العمل اخطارك كعامل باغلاق المنشأة كليا او جزئيا او حتى يتقليص حجمها طالما الاغلاق او التقليص ده حيأثر على عملك و حقك تجاه المصنع او الشركة … بمعنى انه هناك اجراءات قانونية يجب على صاحب العمل اتخاذها حتى يكون الاغلاق قانوني سواء كان كلي او جزئي او حتى تقليص للنشاط..
طيب معنى كده انه فيه حالتين … الأولى انه صاحب العمل يقوم بالاجراءات القانونية للاغلاق و التانية انه مايعملش الاجراءات دي … ايه هو وضعك و حقك القانوني كعامل او موظف في كل حالة !!؟؟
الحالة الأولى:- حالة ما اذا قام صاحب العمل باتخاذ الاجراءات القانونية … يعني انه المسئولين بالشركة او المصنع يخطروك كعامل بالاغلاق او بتقليص النشاط و تخفيضه … يبعتولك جواب او يعملوا اجتماع للعمال و يقولولهم اننا حنقفل المصنع او الشركة او حنقفل قسم معين و نستغنى عن بعض العمال او كلهم و لازم ساعتها تسأل اذا كان تم تقديم طلب للجنة الخاصة بالوزارة و لا لأ و تعرف منين حقولك تعرف ازاي …

في حالة اذا تم اتخاذ الاجراءات القانونية … فانت كده اصبحت خارج الشركة او المصنع و تم الاستغناء عنك كعامل او موظف و اصبحت بلا عمل طب اكل منين لغاية اما الاقي شغل تاني … قانون العمل عملك حاجة اسمها صندوق الطوارئ و الكوارث بتورح عليه انت و زمايلك المستغنى عنهم و تقدم هناك طلب على نماذج عندهم بطلب صرف اعانة شهرية اسمها اعانة كوارث و طوارئ بيصرفولك نص مرتبك الي كنت بتاخده من الشركة لحد اما تلاقي شغل و الاجراءات دي مش بتقعد كتير الموظف هناك بيعمل لكل العمال ملف و بيرسله للوزارة و الوزارة بتأشر بالصرف و بتبعت الشيكات علشان تصرفوها … الفلوس دي مش من جيب الدولة لأ صندوق الطوارئ و الكوارث ده بتم تمويله بجزء من مرتبك شهريا المفروض بيتخصم منك 1% علشانه ده غير انه اي شركة بيتم انشاؤها بتدفع رسم معين لصالح صندوق الطوارئ و الكوارث و طرق تانية علشان يبقى فيه فلوس تتصرف على العمال في حالات الطوارئ و الكوارث …
طبعا انت لما تروح الصندوق حتعرف هناك اذا كان صاحب العمل قدم طلب الاغلاق و لا لأ و اتوافق عليه و لا لأ فساعتها تعرف اذا كان صاحب العمل قام بالاجراءات القانونية للاغلاق و لا لأ …
كمان التأمينات الاجتماعية بتصرفلك اعانة شهرية و كل ده بحد اقصى سنة لحد اما تلاقي شغل تاني و يتم ايقاف الصرف و ممكن يتصرفلك مبلغ مجمع كام شهر على بعض كده و اهو نص العمى و لا العمى كله …
الحالة التانية :- حالة ما اذا كان صاحب العمل لم يتخذ الاجراءات القانونية للاغلاق ..
بمعنى انك فوجئت بالاغلاق و محدش من المسئولين في المصنع او الشركة قالك حاجة و لا صاحب العمل قدم طلب الاغلاق و لا حاجة خالص … في الحالة دي القانون بيعتبر ان صاحب العمل انهى عقودكم بطريقة غير قانونية و بالتالي ده يعتبر فصل تعسفي و تستحق عنه تعويض زي ما نص قانون العمل على حسب مدة عملك بالمنشأة المصنع او الشركة ..
طب ايه الخطوات الي اعملها علشان اخد التعويض ده ؟؟
في نفس اليوم الي بتروح فيه الشغل و تلاقي الشركة او المصنع قفل بتطلع على طول على قسم الشرطة التابع له مكان العمل المصنع او الشركة و تعمل محضر تشتكي المسئولين بالشركة اصاحبها او صاحب المصنع اي ما كان و طبعا تعلموا المحضر كلكم مع بعض في محضر واحد .. في نفس اليوم بتطلع على مكتب العمل التابع له مكان العمل المصنع او الشركة و تروح لمفتش علاقات العمل انت و زمايلك كلكم مع بعض و تعملوا شكوى ضد المسئولين بالشركة او المصنع و تحكي الي حصل بالتفصيل … في الاول حتعملوا كلكم شكوى جماعية و بعد كده كل واحد حيعمل شكوى منفردة علشان تتحول للمحكمة .. و ماتقلقش هم عندهم النماذج و حيساعدوك تملاها و بدون اي مصاريف كل الي محتاجه تصور بطاقتك بس كده … الشكوى الجماعية الي عملتوها كلكم دي حتتحول لمكتب التفتيش في الوزارة و الشكاوى الفردية حتروح للمحكمة العمالية حتروح بعد كده لمتفش مكتب العمل علشان تمضي على طلب احالة الشكوى للمحكمة المختصة و الشكوى لازم تنتهي خلال 21 يوم بيكتب المفتش تقريره و بيبعت للشركة او المصنع و بينتقل كمان يناقشهم في الي حصل بعد الـ 21 يوم بتروح الشكوى للمحكمة الي بتحكملك بالتعويض عن الفصل التعسفي و كافة حقوقك التانية … و ده طبعا موضوع تاني نوالي شرحه فيما بعد..
حاجة اخيرة … ممكن يكون سبب الاغلاق الكلي او الجزئي قوة قاهرة خارجة عن ارادة صاحب العمل .. يعني ايه .. يعني مثلا حادثة جامدة في البلد او سيول او عواصف او زلزال و في ساعتها القانون لا يلزم صاحب العمل بشئ و حتى و لو الزلزال سبب انهيار المصنع او الشركة لا قدر الله … لكنك في الحالة دي بتروح لصندوق الكوارث سالف الذكر الي بيصرفلك اعانة شهرية لحد اما تلاقي شغل تاني او تنتهي القوة القاهرة الخارجة عن ارادة صاحب العمل…

 

مؤسسة حورس للمحاماه والاستشارات القانونيه

الخدمات التي تقدمها المؤسسه

موسسة حورس للمحاماه 01129230200


استشارات في قضايا الاسرة – قضايا الاحوال الشخصية – قضايا الأمور الزوجية – القضايا الجنائية – القضايا التجارية – القضايا المدنية – القضايا العمالية – قضايا الأحوال الشخصية – قضايا الأجانب في مصر – قضايا المصريين في الخارج – استشارات في الزواج من الأجانب – نقدم لكم كافة الدعم القانوني ونوصل الخدمة القانونية لكم بكافة الطرق المتاحة – نحن نقوم بتوثيق الزواج العرفي وإثباته لدى القضاء وتصحيح وضعه
للتواصل عبر الهاتف واتس آب وفايبر

   من خارج مصر                00201129230200

   من داخل مصر                 01129230200