تتصرف ازاي اذا تم القبض عليك – محامي جنائي

• لا تستَدرج لأي دردشة شفويه حول موضوع إتهامك قبل البدء فى التحقيق المكتوب.
• الإجابات النموذجية (محصلش / معرفش / مش فاكر).
• مهما اتغيرت صيغة السؤال خلى إجابتك ثابتة.
• انكر أي علاقة ليك بالمضبوطات اللى مش بتاعتك.
• لو طلب منك باسورد التليفون أو الفيسبوك قول مش فاكر.
• النيابة مسؤولة عن إتهامك والتحقيق معاك فالمفروض تبقى محايدة وفى نفس الوقت ترجح إدانتك
  فى النهاية – عقم فى النصوص اللى بتنظمها – وبالتالى متفتكرش المحقق هيكون فى صفك.
• المحامى ملهوش أى دور لحد التحقيق ما يخلص – طبقا للقانون للأسف – فمتحاولش تسأله
  أو تطلب منه إجابات بعنيك لأن ده بيوتر المحقق وبيخليه يرجح إدانتك.
• لو أثناء تفتيشك أو تفتيش منزلك تم أخذ أى شئ وملقتهوش فى النيابة اذكره فى أقوالك
  و اتهم القائم بالتفتيش بسرقته.
• لو تم التعدى عليك بالضرب أو السب – وإن كان دا قل مؤخراً – أتأكد انك تذكر دا أمام النيابة
  ولو فيك إصابات اطلب عرضك على الطب الشرعى.

تابع المزيد: مستشاركم القانوني للرد علي كافة الاستشارات القانونيه

نصائح أفضل محامي جنائي

• المواعيد مهمة من حق الجهة اللى قبضت عليك تحتفظ بيك 24 ساعة قبل عرضك على النيابة
  لو قعدوك اكتر من كدا اتأكد إنك تذكر الميعاد الحقيقى اللى اتقبض عليك فيه.
• دايماً أول سؤال بيبقى معاك محامى، هنا تجاوب بأيوه وتذكر اسمه الثلاثى وتتمسك بحضوره وترفض حضور أي محامى تانى تندبهولك النيابة ومتقلقش هما اللى ملزمين يجيبولك المحامى بتاعك ولو أصروا على انتداب محامى أرفض الاجابة على أسئلتهم ودا حقك
• السؤال الثانى بيكون هل معاك شهود نفي لو فيه شهود على واقعتك او على القبض عليك
  وانت متاكد إنهم هيشهدوا اذكر أسمائهم لو مش متأكد قول كان فيه ناس كتير موجودة
  إنما متقولش لا إلا لو فعلا مكنش فيه شهود.
• هيكون فيه أسئلة من نوعية هل تعرف الضابط فلان لو تعرفه قول أه والسؤال اللى بعده هيكون هل فيه بينك وبينه خلافات لو فيه قول أيوه متخافش لو قلت لا هيكون فيه سؤال
  بيقول ما تفسيرك لما سطره الضابط فلان فى محضره (يعنى بيقول عليك كده ليه) هنا ومن وجهة نظري تجاوب بأنه اكيد مطلوب منه عدد قضايا علشان كده لفقلى الإتهام ده.
• لاحظ انه لا يجوز تحليف المتهم ولا ترهيبه ولا ترغيبه يعنى لو المحقق قالك طب تحلف قوله مينفعش تحلفني ولو قالك رد بدل ما هحبسك قوله مينفعش تهددني ولو قالك قول وأنا اروحك غالباً بيضحك عليك.
• من حقك تتابع كل اللى بيتكتب فى التحقيق على لسانك أو تقرأه في النهاية قبل ما توقع عليه
  ولو مكتوب كلام غير اللي أنت قولته أتمسك بتغييره او أمتنع عن التوقيع.