ازاي تملا بيانات ايصال الامانة ؟

اعداد / عبد المجيد جابر المحامي  01111295644
موضوع بسيط جدااا لكن بعض الناس بتغلط فيه للاسف ، فحبيت اوضحه في نقاط ، بايجاز شديد.
✳ فيه دفاتر بتتباع في المكتبات ، فيها ايصالات مطبوعه ( زي اللي في الصوره ) ، وتقدر برضه تكتبه في ورقه عاديه لو مكنش معاك ايصال مطبوع.

ونقدر نحدد اهم العناصر وفق الترقيم اللي في الصوره كما يلي :-

✳ خانه ( ١ ) بتكتب فيها اسم الشخص اللي انت هتمضيه على ايصال الامانه ، يعني الشخص اللي خد منك الفلوس.
✳ خانه ( ٢ ) بتكتب فيها عنوانه بالتفصيل من واقع بطاقة الرقم القومي بتاعته.
✳ خانه ( ٣ ) بتكتب فيها رقم بطاقته بالكامل ( ١٤ رقم ).
✳ خانه ( ٤ ) بتكتب فيها تاريخ صدور البطاقه ، وده بيكون في اعلى اليسار في خلفيه البطاقه ، عباره عن الشهر والسنه.
✳ خانه ( ٥ ) بتكتب فيها اسم حضرتك.
✳ خانه ( ٦ ) بتكتب فيها المبلغ بالارقام ثم بالحروف.
✳ خانه ( ٧ ) بتكتب فيها اسم الشخص التابع ليك ، اللي المفروض هيستلم الفلوس من الشخص الموقع علي الايصال.
✳ خانه ( ٨ ) توقيع الشخص رقم ١ اللي استلم منك الفلوس.
✳ خانه ( ٩ ) البصمة بتاعت نفس الشخص اللي استلم الفلوس ، رقم ١.
✳ الخطوط الحمراء دي المكان اللي بتقطع منه اصل الايصال عن كعب الايصال رقم ( ١٠ ) وده المفترض انه بيكون موجود في دفتر ايصالات الامانه ، زي الشيكات كدا.
……..

✴ ملحوظات هامه :-

 الافضل ان الايصال كله يحرر بخط من وقعه.
 ضروري جداا ان الايصال كله يتملي في ذات لحظة كتابته ، وبنفس القلم ، يعني متمضيهوش ايصال على بياض وتيجي انت تكتب الصُلب بعدها بشهور.
 ضروري تحتفظ بصورة بطاقة الرقم القومي لشخص الموقع علي الايصال.
 متكتبش تاريخ على الايصال ، لانك لو كتبت تاريخ ومر عليه ثلاث سنوات لم ترفع الايصال خلالها ، هتكون الدعوى سقطت بالتقادم ، وانا عارف ان فيه رأي فقهي بيقول ان العبره بتاريخ الامتناع عن تسليم المبلغ وليس بتاريخ تسلمه شبيه بقايمه المنقولات كدا ، لكن الاتجاه المضطرد في المحاكم انه بعد ثلاث سنوات من تاريخ الايصال المحكمه بتحكم بانقضاء الدعوي ، فالافضل عدم كتابة تاريخ بدلا من الدخول في جدل فقهي.
 لو مفيش واقعة تسليم حقيقيه لفلوس ، وكان الايصال مجرد ضمان لأي معامله ، فخلي بالك من حاجتين :-
اولا : المبلغ اللي انت هتكتبه يكون متناسب مع الواقع بقدر الامكان ، يعني متكتبش ارقام مبالغ فيها وغير منطقيه ، يعني مثلا مينفعش راجل عاطل لا يعمل وحالته فقيره يكتب انه سلم شخص مبلغ اتنين مليون عشان يوصلهم لحد ، لان الفكره مش منطقيه.
ثانيا : الشخص في الخانه رقم ( ٧ ) ، لازم يكون من المنطقي انك ترسله الفلوس عن طريق شخص الموقع علي الايصال ، يعني مينفعش تكتب ان زيد استلم منك خمسين الف عشان يوصلهم لزوجتك المقيمه معاك في نفس المنزل ، لانها فكره غير منطقيه.
…..

هتقولي هو طالما وقع انه استلم يبقى خلاص ؟

هقولك لأ مش شرط ، لان فيه دفع ديما المتهم بيدفع بيه وهو ( انتفاء ركن التسليم ) وده معناه انه بينكر انه استلم منك الفلوس اصلا – حتي لو كان وقع علي الايصال – وهيقول ان الايصال ده كان ضمان لأي معامله اخري ، وهيعزز هذا الدفع – ضمن ما يعززه – بالمنطق ، زي مثلا انه من غير المنطقي ان المتهم اللي من مكان بعيد يستلم منك فلوس عشان يسلمها لزوجتك او ابنك المقيمين معاك في نفس المنزل.
وفيه دفوع تانيه ممكن المتهم يدفع بيها التهمه عن نفسه ، والمحكمه تحكم ببراءته حتي لو كان الايصال مذيل بتوقيعه.
✴ وموضوع خيانة الامانه ده فيها كتب ومجلدات ، لا يتسع المقام لشرح كل تفاصيلها ، لكن حبيت استعرض الطريقه المثلي لملأ بيانات الايصال لغير المتخصصين.
…..
✴ والجريمه بتحكمها الماده ٣٤١ عقوبات ، والتي حددت لها عقوبه الحبس ( بشكل مطلق ) ، فيكون طبقا لحده الادني ٢٤ ساعه وحده الاقصي ثلاث سنوات.