">مخالفات البناء واجراءات التصالح فيها – مؤسسة حورس للمحاماة

مخالفات البناء واجراءات التصالح فيها

مخالفات البناء واجراءات التصالح فيها

أولا – ما قيمة مقابل التصالح في مخالفات البناء؟

والإجابة هى : ان القيمة تتراوح بين حد أدني 50 جنيها وأقصى 2000 جنيه للمتر، حسب المنطقة السكنية الموجود بها الوحدة المخالفة، وستتولي كل محافظة 50 جنيها وأقصى 2000 جنيه، بسعر المتر، بعد تقسيم المحافظة إلى عدة مناطق بحسب المستوى العمراني والحضاري وتوافر الخدمات، و يجوز أداء قيمة تقنين الأوضاع على أقساط.

ثانيا : كيفية التصالح وإجراءاته ؟

والإجابة هى : يُقدم طلب التصالح للجنة المختصة خلال مدة لا تجاوز ستة أشهر من تاريخ العمل باللائحة التنفيذية للقانون، وذلك بعد سداد رسم فحص، يدفع نقدًا بحد أدنى 1000 جنيه، وبما لا يجاوز 5 آلاف جنيه.- تُجري اللجنة معاينة ميدانية للموقع محل المخالفة، وتكلف طالب التصالح بتقديم تقرير هندسي معتمد من مكتب استشاري هندسي عن السلامة الإنشائية لكامل العقار المخالف.- يجري البت فى طلب التصالح خلال الـ6 شهور المحددة لتقديم المستندات، على أن تنتهى اللجنة من أعمالها خلال 4 أشهر على الأكثر من تاريخ تقديم الطلب.

ثالثا : ما هي المخالفات المحظور التصالح فيها؟

والإجابة هى : حظر القانون التصالح في الأعمال التى تخل بالسلامة الإنشائية للبناء، والمخالفات الخاصة بالمبانى والمنشآت ذات الطراز المعمارى المتميز، وتجاوز قيـود الارتفاع المقررة من سلطة الطيران المدني، أو تجاوز متطلبات شئون الدفاع عن الدولة، والبناء على الأراضى المملوكة للدولة، والبناء على الأراضى الخاضعة لقانون حماية الآثار وحماية نهر النيل.

رابعا : ما الموقف حال رفض طلب التصالح؟

والإجابة هى فى حالة رفض اللجنة طلب التصالح على المخالفة أو عدم سداد قيمة مقابل التصالح خلال 60 يومًا من تاريخ موافقة اللجنة، يصدر المحافظ أو رئيس الهيئة المختصة، بحسب الأحوال، قرارًا بالرفض وباستكمال الإجراءات التنفيذية اللازمة، أو بتصحيح

الأعمال المخالفة وفق أحكام قانون البناء.

خامسا : هل يجوز التظلم في حالة رفض التصالح؟

والإجابة هى : نعم، يجوز لمن رُفض طلبه للتصالح التظلم من قرار الرفض خلال 30 يوماً من تاريخ إخطاره به، وتتولى نظر التظلم لجنة تـُشكل بمقر المحافظة أو الهيئة الإدارية المختصة برئاسة مستشار من مجلس الدولة، وعضوية مهندس استشارى متخصص فى الهندسة المدنية لا تقل خبرته عن 15 عاما، وثلاثة على الأقل من المهندسين أحدهم مدنى والأخر معمارى لديهما خبرة لا تقل عن 10 أعوام ومقيدين بنقابة المهندسين.- تبت اللجنة فـى التظلم خلال 90 يوما، من تاريخ تقديم الطلب، ويعتبر انقضاء تلك المدة دون البت فى الطلب، أن التظلم مقبول.

سادسا أين تذهب الأموال المُحصلة من التصالح في مخالفات البناء؟

والإجابة هى : تؤول جميع المبالغ المحصلة إلى الخزانة العامة للدولة، ويخصص منها نسبة 25% لصندوق الإسكان الاجتماعى والمشروعات التنموية، ونسبة 39% لمشروعات البنية التحتية من صرف صحى ومياه شرب، ونسبة لا تزيد عن 1% لإثابة أعضاء اللجان المختصة بنظر التصالح في مخالفات البناء، والعاملين بالجهة الادارية المختصة القائمة بشئون التخطيط والتنظيم وغيرهم من العاملين بالوحدات المحلية والأجهزة

سابعا : ماذا عن البناء خارج الأحوزة العمرانية المعتمدة؟

والإجابة هى : حظر القانون التصالح فيها باستثناء بعض الحالات وهي، الكتل السكنية المتاخمة للأحوزة العمرانية للقرى والمدن، ويقصد بها المباني المكتملة والمتمتعة بالمرافق والمأهولة بالسكان والمقامة على مساحات فقدت مقومات الزراعة وطبقًا للتصوير الجوى فى 22/7/2017 والتى يصدر بتحديدها قرار من لجنة الأحوزة العمرانية المشكلة بقرار من وزير الاسكان والمرافق والمجتمعات العمرانية الجديدة، وكذلك المشروعات الحكومية والخدمية، والمشروعات ذات النفع العام.

ثامنا : ما هو الموقف في حال وجود قضايا تتعلق بالمخالفات؟

والإجابة هى : يُمنح مُقدم طلب التصالح، شهادة، مثبتاً فيها رقمه وتاريخ قيده والمستندات المرفقة بالطلب، ويترتب على تقديم هذه الشهادة إلى المحكمة أو الجهات المختصة وقف نظر الدعاوى المتعلقة بالمخالفة، ووقف تنفيذ الأحكام والقرارات والإجراءات الصادرة بشأن الأعمال المخالفة محل هذا الطلب لحين البت فيه.- يصدر المحافظ أو رئيس الهيئة المختص، قرار بقبول التصالح بعد موافقة اللجنة المختصة على الطلب، وسداد قيمة مقابل التصالح، ويترتب على ذلك انقضاء الدعاوى المتعلقة بموضوع المخالفة، وإلغاء ما يتعلق بها من قرارات وحفظ التحقيقات بشأن هذه المخالفات إذا لم يكن قد تم التصرف فيها، ويعتبر هذا القرار بمثابة ترخيص للأعمال المخالفة محل هذا الطلب.- يترتب على الموافقة على طلب التصالح فى حالة صدور حكم بات فى موضوع المخالفة وقف تنفيذ العقوبة المقضى بها، وتأمر النيابة العامة بوقف تنفيذ العقوبة إذا حصل التصالح أثناء تنفيذها، وفى جميع الأحوال لا يترتب على قبول التصالح على المخالفة أى إخلال بحقوق ذوى الشأن المتعلقة بالملكية.

قيمة مبالغ جدية التصالح و قيمة الغرامات لمخالفات البناء

بقلم / عبد المجيد جابر المحامي 01111295644
معلومات هامة جداً لمن يريد التصالح الناس متعرفهاش
ركز كده معايا …
بالنسبة لمبالغ جدية التصالح المعلن عنها تقرر انها تكون الحد الأقصى
يعنى هدفع كام جدية وانا بقدم الطلب ؟
الاصل انك هتدفع ٢٥٪‏ فقط جدية مع تقديم الطلب
حسبه بسيطه كده تعرف هتدفع حوالي كام تقريبا
هتحسب مساحه البيت الاجماليه
( الطول في العرض)
يعني مثلا عندك بيت 100 متر هيبقي التصالح 100 متر في عدد الادوار المخالفه والأجمالى هتضربه فى قيمة سعر المتر المعلن عنه في المحافظة او الحى اللى انت تابع له ومنه هتدفع ٢٥٪‏ وانت بتقدم الطلب
وكمان قيمة المصالحه بتتقسط بتدفع 25٪ والباقي علي ثلاث سنوات
ايه كمان بقي الناس مش واخده بالها منه ؟؟
ان حضرتك لما تقدم على طلب تصالح تعمل حسابك ان تكون واجهة العقار متشطبه قبل لجنة المعاينة متنزل لأن دا شرط من شروط قبول طلب التصالح وللعلم تم أستثناء القرى والتجمعات القروية من هذا الشرط ….
 
اخر ميعاد للتقديم علي التصالحات امته؟؟
هو يوم 2020/9/30
يعني مش هتعرف تقدم علي تصالح بعد الميعاد ده
ازاى تخلص من محاضر البناء والمخالفات
جدية التصالح و قيمة الغرامات لمخالفات البناء

شرح القانون رقم 17 لسنه 2019 بشأن التصالح في مخالفات البناء..

أحد أهم المخالفات التي شهدتها السنوات السابقة والتي كانت تشغل الحيز الأكبر للقضايا داخل المحاكم هي مخالفات البناء ، ورغم تعديل العقوبة أكثر من مرة علي المخالف سواء عقوبة الحبس أو الغرامة ورفع الحدين الأدني والأقصي للعقوبة في القانون رقم 119 لسنة 2008 ” قانون البناء الموحد ” ، إلا أنه وجد المشرع أن المخالفات في تزايد مستمر وأن العقوبة لا تحقق رادع بسبب عدم توافر أماكن للسكن واضطرار المواطن إلي البناء علي الأراضي الزراعية ،
ودون الحصول علي التراخيص ،مما دعا المشرع إلي إقرار قانون التصالح مع المخالف مقابل دفع رسوم والمحافظة علي البناء من قرارات الإزالة
وبعد فترة طويلة، البرلمان أقر “قانون التصالح في مخالفات البناء”، وده هيسمح لملايين المواطنين التصالح مع الدولة سواء كان البناء بدون الحصول علي التراخيص اللازمة أو بناء على أراضي زراعية، وكمان هيسمح لهم بدخول المرافق، وعدادات المياه
والكهرباء ، لكن وفق شروط كتير، هنحاول نشرح أهمها هنا
:
*_ إزي تقدم طلب التصالح وهتدفع كام؟
.
– في كل محافظة هيكون في لجان فنية لمراجعة الطلبات، وبمجرد صدور اللائحة التنفيذية للقانون (خلال 3 شهور من إقرار الرئيس له)، هيبقى مسموح لك تقدم للجنة دي طلب تصالح خلال 6 شهور، واللجنة هتنظر في الطلبات خلال مدة 4 شهور بحد أقصى.
– هيكون في “رسم فحص” للمبنى بحد أدنى 1000 جنيه، وحد أقصى 5000 جنيه.
– اللجنة هتديك شهادة بإنك سجلت معاها، وبالشهادة دي هيتوقف أي إجراءات كانت هتتاخد ضدك سواء قرار إزالة أو قضية بناء مخالف ، إلي حين البت في الطلب
*_مقابل التصالح هيكون كام؟
– بحد أدنى 50 جنيه للمتر وحد أقصى 2000 جنيه للمتر. واللي هيحدد سعر المتر لجان هيتم تشكيلها في كل محافظة عشان تقسمها لمناطق بحسب المستوى العمراني والحضاري، وهيبقي في إمكانية التقسيط
*_طب ولو اللجنة وافقت على طلب التصالح أو رفضته، إيه اللي هيحصل؟
– لو في موافقة، هيصدر قرار بقبول التصالح، وهيكون قدامك فرصة 60 يوم تدفع الفلوس اللي اللجنة حددتها بناء على تقيمها للمنطقة وسعر المتر فيها
– لو طلبك اترفض، أو اتأخرت في سداد قيمة التصالح عن 60 يوم، يبقي خلاص أي إجراءات كانت ضدك سواء قضية أو قرار إزالة هترجع تشتغل تاني
– كمان القانون وفرلك فرصة تانية للي طلبه هيترفض، أنه يقدم تظلم خلال 30 من تاريخ إخطاره بالرفض، ولازم اللجنة تنظر فيه خلال 90 يوم
.
*بس كده، ولا في حاجة تانية؟
– في نقطة مهمة تم النص عليها في القانون، وهي إنه لن يصدر القرار النهائي بالتصالح إلا “بعد طلاء واجهات العقارات” كاملة التشطيب (مع استثناء المباني في القرى من الشرط ده)

التصالحات للمباني المخالفة والصالحة للتصالح

إمتى أعرف إنه ينفع أعمل تصالح في الحالة
دي بنشوف تاريخ المخالفة إذا كانت خارج الحيز العمراني حتي تاريخ 22-7-2017 أو داخل الحيز العمراني حتي تاريخ 8-4-2019
طيب لازم يكون أتعمل أي محضر مش لازم يكون أتعمل ليك محضر عشان تقدم علي تصالح
طيب أنا لو متعملش ليا محضر هستفاد إيه من التصالح؟! – هتقنن وضعك : مش معني أن أنت متعملش ليك محضر لسبب ما سواء كانت كوسا أو إهمال يبقي حضرتك مش مخالف لا مخالف ومش هتقدر بعد كده تعلي طوبة واحدة في البيت عشان أنت ما عندكش أساسًا رخصة وما قدمتش علي تصالح.
طيب_لو_أتعمل_لي_محضر – والحمد لله أخدت براءة فيه وضعي إيه دلوقتى. محضر البناء بدون ترخيص له شقين ( شق جنائي – شق إداري ) البراءة بخصوص الشق الجنائي دا خاص بشخصك أما الشق الإاداري فأنت مازلت مخالف ومش هتعرف تعمل تعلية أو تبني أدوار تاني هتقف علي كده لو حبيت ترفع دور هتتظبط
هيتعملك ١) محضر مباني بدون ترخيص ٢) محضر إستئناف اعمال ٣) محضر عدم تنفيذ قرار إزالة
أنا هستفاد إيه من التصالح التصالح يعتبر إنك بتشتري رخصة للبيت حتي لو البيت خارج كردون المباني يعني أصبحت داخل الكردون وليك حق في جميع المرافق 
للمعلومة في حصر دلوقتي بيتعمل للقضايا من عام 2009 حتي 2020 عشان الغرامات التي لم تحصل حتي الأن وهتلاقي جيلك محضر تبديد ( الغرامة بمبلغ وقدره )
 

طيب التصالح بيكون ازاي؟؟

أولًا :- هتقدم بصورة البطاقة وصورة عقد البيت والباقي علي الأستاذ المحامي بعد كده 
طيب القضايا اللي شغالة أعمل فيها إيه يا أستاذ؟؟
لما بتروح تقدم علي تصالح والمحامي بيقدم المستندات المطلوبة بيأخد حاجة إسمها نموذج 3 اللي بيتقدم للمحكمة وتوقف القضية تعليقًا لحين الفصل في التصالح
 طيب بصراحة كده أنا خايف أدبس وأدفع فلوس كتير في التصالح ده أعمل إيه بص يا محترم أنت ممكن تعمل حسبة بسيطة كده تعرف هتدفع حوالي كام تقريبًا هتحسب مساحة البيت الإجمالية ( الطول في العرض ) يعني مثلًا عندك بيت 100 متر هيبقي التصالح 100 متر في عدد الأدوار المخالفة وسعر المتر من 50 إلي 125 في القري وبيتحسب سعر المتر علي أساس الشارع والمنطقة اللي أنت فيها 
ممكن أعرف أخر ميعاد للتقديم علي التصالحات إمتي؟؟
هو يوم 2020/9/30 يعني مش هتعرف تقدم علي تصالح بعد الميعاد ده  بالنسبة لموضوع التواريخ والتصالح علي المخالفات قبل 2017/7/22 خارج الحيز وأنا بصراحة المحضر معمول بعد التاريخ ده بكتير
ايه الحل
ليها ثلاثة_حلول ١) شهادة كربونية. ٢) تصوير جوي. ٣) أي صورة تعاقد علي أي مرفق كهرباء أو مياه. طيب_التكلفة؟ هتكون :- أقل من الغرامة بتاعت المحكمة وأقل من الإزالة للبيت وأقل من الكفالة للنيابة العسكرية التي تصل إلى مليون وما بتقلش عن 15 ألف وكمان قيمة المصالحة بتتقسط بتدفع 25٪ والباقي علي ثلاث سنوات.
خطوات التصالح :
– ١- حضرتك هتروح الحي تفتح ملف بصورة بطاقة المالك و ورق الملكية.

٢ – خلال أسبوعين من تاريخ الملف حضرتك لازم تستوفي باقي المستندات طبقًا للمادة ٣ من القانون.

كافة التساؤلات وإجاباتها حول قانون التصالح في مخالفات البناء

إيه هي بقي المستندات المطلوبة :

– ١. أصول وصور ضوئية لمستندات الملكية.
٢. رسم هندسي ( معماري وإنشائي ) معتمد.
٣. تقديم ما يثبت الحالة الإنشائية للعقار ( دي إسمها شهادة سلامة إنشائية ودي ملف فرعي بيعملهولك مهندس … بيبقي فيه اللوائح والنوتة الحسابية وتقرير التربة وشهادة السلامة نموذج ٢ ب وشهادة سلامة عليها علامة مائية لنقابة المهندسين وحاجات تانية بيجهزها المهندس والملف دا بيدخل نقابة المهندسين يعتمد بالكامل وبتدفع كمان رسوم دمغه للنقابة ٤.٥ ف الالف من قيمة الأعمال للمنشأت من أول ٢٠١٥ ).
٤. إيصالات مرافق ( مياه – غاز – كهرباء ) ودي عشان تثبت تاريخ المخالفة.
5. في حالة عدم وجود إيصالات مرافق يتم إرفاق أي مستند يدل علي العقار وتاريخ المخالفة ( شهادة مشتملات – محضر مخالفة – تصوير جوي ).
6. توكيل رسمي في حالة وجود محامي ( ودا_أفضل_طبعًا_جدًا ).
7. صورة ضوئية من بطاقة المالك.
8. ملف كارتون ودا عند الموظف.  أهم من كل اللي فات دا بعد لما بتقدم الملف دا بتدفع رسوم الفحص وبعد كدة بتستني لجنة السلامة الإنشائية تحدد لك ميعاد تنزل تعاين المنشأ و المفروض بيكون في مندوب من الداخلية بيحضر لمراجعة أشتراطات الدفاع المدني. 
– اللجنة بقي حسب ما بتشوف حالة المنشأ ممكن تطلب مستندات هندسية أخري زي كور تست أو كشف أحد عناصر المنشأ للتأكد من التسليح أو بتطلع تقريرها علي طول بعد كده بقي بيراجعوا موقفك مع وزارة الطيران المدني.
– الكلام دا لحد تاريخ النهاردة وفالنهاية بيطلع تقرير نهائي للمصالحة بقبولها وتحديد قيمة الغرامة طبقًا لكمية المخالفات اللي عندك أو برفض التصالح في عدم إستيفاء شروط السلامة أو بتخفيف المبني أو تدعيم المنشأ من الآخر بيشوفوا إيه الحل ويطلعولك تقرير وتقدير للمبلغ المطلوب حلو_كده 
نيجي بقي لتقدير رسوم الغرامة
ودي تعتمد علي حاجتين …..
ركز بقي معايا كده أ. مساحة المخالفة ( مساحة الأرض في عدد الأدوار ) يعني لو أرض ١٠٠ متر طالعة ١٢ دور سكني ودور إداري ودور تجاري تبقي المخالفه بتاعتك – ١٢٠٠ متر سكني – ١٠٠ متر تجاري – ١٠٠ متر اداري وبعدين ب. المنطقة اللي المنشأ موجود فيها هل قرية أم مدينة علي شارع رئيسي ولا لا دا بيحدد سعر متر المخالف والتسعير دا بينزل فالجريدة الرسمية بقرار من المحافظ لكل محافظة تشوف سعر متر منطقتك كام فالإداري والتجاري والسكني وتضربه فالمساحة يطلعلك قيمة المخالفة يعني مثلًا لو أنت ساكن فالإسكندرية حي منتزه أول أو ثان قبلي وعلي شارع جانبي سعر المتر بيكون ( ٤٥٠ج سكني – ٨٠٠ تجاري – ٦٠٠ إداري ) تبقي غرامتك ( ٤٥٠ ×١٢٠٠ + ٨٠٠ × ١٠٠ + ٦٠٠×١٠٠ = ٥٤١٤٠٠ج ) دا إلا إذا كان في غرامات أخر
_ طب إيه هي الحالات المحظور التصالح فيها بشكل نهائي؟

في 8 حالات محظور التصالح فيها بأي شكل، وهي :

1_ البناء علي الأراضي المملوكة للدولة ، إلا إذا كان صاحبها تقدم بطلب تقنين الأوضاع للأراضي المملوكة للدولة
2_ البناء علي الأراضي الخاضعة لقانون حماية الآثار وحماية نهر النيل
3_ الأعمال اللي بتخل بالسلامة الإنشائية للبناء يعني منزل آيل للسقوط مثلا مش هيرخصلك ،
وده هيتعرف ازاي ؟
كل طلب هيتقدم هتطلع معاينة من مكتب مهندس إستشاري عن صلاحية المبني للتصالح من عدمه والتقرير بتاعه هو اللي هيحدد طلبك هيتوافق عليه ولا هيترفض
4_التعدى على خطوط التنظيم المعتمدة وحقوق الارتفاق المقررة قانونًا. والمقصود هنا الخطوط الموضوعة لتنظيم الشوارع ومساحتها عشان المرافق من كهرباء ومياه وغيرها
5_ المخالفات الخاصة بالمباني والمنشآت ذات الطراز المعماري المتميز.
6_تجاوز قيود الارتفاع المقررة من سلطة الطيران المدني، أو تجاوز متطلبات شؤون الدفاع عن الدولة
7- تغيير الاستخدام للمناطق التي صدر لها مخططات تفصيلية معتمدة من الجهة الإدارية
8- البناء خارج الأحوزة العمرانية المعتمدة (يعني خارج زمام المدن والقرى) مع استثناء الأراضي الزراعية اللي عليها مباني خدمية أو سكن خاص (بناء على ضوابط بيحددها وزير الزراعة)، ومشروعات الإنتاج الزراعي والمشروعات الحكومية والخدمية اللي يحددها مجلس الوزراء. وكمان الكتل السكنية المتاخمة للأحوزة العمرانية للقرى والمدن. ويقصد بها المبانى المكتملة والمتمتعه بالمرافق المأهولة بالسكان والمقامة على مساحات فقدت مقومات الزراعة وطبقًا للتصوير الجوي في 22/7/2017
( يعني لو المبني خارج كردون المباني، ومأهول بالسكان وفي مرافق، ومبني قبل يوم 22 يوليو 2017 “اخر تصوير جوي “، هيتم التصالح معاك. لكن لو مبني بعد كده أو مكنش مسكون ، يبقى لأ هتفضل مخالف وللأسف طلبك هيترفض ، لأن القانون صدر لتقنين أوضاع قائمة بالفعل ، وليس مخالفات جديدة .


اترك تعليقاً

error: تواصل مع مؤسسة حورس للمحاماة 01129230200