طرق النصب الحديثه في مصر

عزيزي المغفل الكسول الطماع اللي معاك قرش محيره وعايز يطيره.. نحن نساعدك لاختيار نوع الكف الذي ستأخذه على قفاك. ————–؛————- تشكيلة منتجاتنا التي تناسب كل الاذواق: ١- نعلمك صنعة ونبيعلك الماكينات والمواد الخام ونشتري منك الانتاج. -النتيجة: انتاجك غير مطابق..٨٩%..بيعه بمعرفتك.

٢- اشتري جملة ولو مابعتش ممكن ترجع المنتج. -النتيجة: لأ معلش انت شاريه من اسبوع والكيس إتبهدل والبضاعة خرجت من المخزن. ٣- تداول معنا بأول رصيد ١٠ دولار هدية. – النتيجة:انت كسبت ٢

٠ دولار وعشان تاخدهم لازم تدفع ٥٠ . ٤- اشتري منتج يساوي ١٠ جنيه ب ٣٠٠٠ جنيه ولو بعت لصحبك زيه( لو بعت صاحبك زي مااتبعت) هاتاخد ١٥٠٠ جنيه. – النتيجة: لازم كل اصحابك يبيعوا اصحابهم والا مش هتكسب زي المستر الوحيد في مجموعة من ١٠ الاف فرد اللي متصور جنب العربية اللي ب ٤٠٠ الف جنيه اللي كسبها بعد مادفع معارفه ومعارفهم (٣ الاف للسلعة × ١٠ الاف فرد= ٣٠ مليون)

٥- ساهم في شركة مساهمة واقل قيمة مساهمة ٥٠ الف جنيه وليك فرصة عمل انت واولادك وربح سنوي متوقع ٣٥% والضمانات بشيك. – النتيجة: انت هتساهم في شركة اموال ومالكش دعوة بادارتها لا انت ولا ولادك، وشيك ايه وانت مفروض تأخد اسهم رسمية بمساهمتك..لو خدت يعني.. ومافيش ربح سنوي متوقع من غير دراسة جدوى،وحد فاهم يعملها تقييم ،وتقييم لادارتها،وتقييم لمصداقيتهم.

٦- محتاج تمويل لعملية توريد لمدة شهر بربح ٥٠%. – ماتستناش نتيجة: ده لو قال لاي تاجر.. هيدخل معاك بالبضاعة ويقبل ب ١٠% واقل.

٧- باشتغل في الادوية/تجارة جملة/تربية حيوانية/بيع بالتقسيط.. ومحتاج سيولة كبيرة وربحك شهري ٣% وفلوسك مضمونة بشيك وايصال امانة. – النتيجة: معلش نتحاسب اخر السنة انا ماعملتش الجرد ولو عايز تخرج..هات حد مكانك.

٨- هانعمل مساهمة في حتة ارض كبيرة وليك شقة ياتبيعها ياتسكن فيها. -النتيجة: معلش المرافق.. السيولة..الترخيص.. المشروع وقف..خد حتة الارض انت و٥٠٠ مساهم وإعملوا عليها مظاهرة..انتم حرين في ملككم.

٩- تملك قطعة ارض ١٠٠٠ فدان وادفع ١% ، واحنا اللي هنسددلك باقي قيمتها.. لما نزرعهالك على حسابنا ونبيع المحصول. – النتيجة: عارف الجبل اللي هنا ده.. اطلع علي قمته..واقعد على…..أرضك. ———-؛———-

تعرف النصاب بأيه:

١- يقولك شيك او ايصال امانه..مع انها عملية تجارية يعني تكون بعقد.

٢- مايكونش ملهوف على فلوسك..ولازم انت تتحايل عليه عشان ياخدها وينصب عليك.

٣- تلاقيه مفصل لك موضوع على مقاسك.. يعني انت مغترب..يقولك هاادفع للعيال الربح شهري عشان المصاريف، و لو مقيم وعايز تستثمر ..يقولك انت مدير في المشروع، وبعدها لاتشوفه ولاتشوف مشروع، ولو نفسك في شقة..يلعب عقاري، ولو نفسك في وظيفة يوعدك بوظيفة، ولو عايز تضحك عليه وتعرف سر شغله..هيروقك ويضحك عليك.

٤- مجرد قبولك لعملية غير قانونية او ربوية او استغلال لطرف آخر..يخليك نصاب زيه.

٥- غاويين وبيحبوا وبيفضلوا وبيختاروا الناس الجامدين الواصليين واللي صعب حد يضحك عليهم واللي ممكن يجيبوا حقهم عافية..عشان دول بيطمنوا بقية الناس ان مافيش مشكلة ولو حصلت هتتحل. (معلش لو مش فاهم الجزء ده..هتحتاج وقت تقرأ وتفكر تاني). أخيرا:

١- الشراكة والتمويل والمساهمة..أدوات استثمار جيدة وحلال..لكل من لايستطيع عمل مشروع..ولكن لها قواعد قانونية وتنظيمية ورسمية.

٢- أمانة عليك ماتبعتش تقولي ايه رأيك في شركة كذا للاستثمار سريع الطلقات؟أو تبعتلي عقد او دراسة جدوى اعملهم تقييم.. أنا مااعرفش كفاءة مديرينهم ولا ذمتهم ولامصداقيتهم.

٣- ماتزعلش مني لو حد استثمر وكسب، وانا بكلامي ضيعت عليك الفرصة..نص اللي بيستثمروا مع الناس دول بيشتغلوا معاهم او عايزين حد يدخل..عشان يخرجوا.

٤- اعذرني لقلة معلوماتي او لتقادمهما لاني من جيل قديم ومن مدرسة ( الفلوس مابتجيش الا بالشقا) لا اعرف في التعدين ولا التداول ولا بناء الثروة، وقريت الف كتاب عن الحرية المالية..مافهمتش كلمة منهم.

مؤسسة حورس للمحاماه 01111295644