أول شهر محاماه | عاوز اتعلم مهنة المحاماه
أول شهر محاماه | عاوز اتعلم مهنة المحاماه
المقال هيكون جامع لأهم الأعمال اللي ممكن يعملها محامي جدول عام في اول شهور من عمله في اي مكتب .. يعني من الاخر لو انت لسه منزلتش وخلاص علي وشك تنزل مكتب ركز معايا علشان الكلام ده هيكون مهم جدا لك
مراحل سير الدعوي لازم يكون واضح في ذهنك أوي علشان ده أساس أي عمل هتقوم به طول فترة عملك بالمحاماه .. واعتبرها اهم من التفاصيل الصغيرة اللي ممكن تعرفها لان اي معلومة لازم تحطها في المكان الصح .
علشان كدة كان اهم معلومة انك تعرف ان مراحل الدعوي هي :
قيد الدعوي لدي المكتب الامامي
اعلان الخصوم بأصل صحيفة الدعوي
حضور الجلسة وتقيدم حوافظ المستندات
معرفة قرار القاضي او الحكم لو اخر جلسه
طيب ده نبذة مختصرة جدا عن اجراءات التقاضي بشكل عام فيما يخص #الدعاوي_المدنية .. اللي هي شخص متضرر بيروح لمحامي يوكله ينوب عنه في اخذ حقه .. ثم المحامي يكتب صيغة الدعوي ويروح يودعها في المكتب الامامي .. ثم يعلم المدعي عليه عن طريق المحضرين .. ثم ينتظر الجلسة ليقدم حفاظة مستنداته لاثبات حقه .. ثم ينتظر اخر الجلسة لمعرفة القرار من السكرتير .. المدعي عليه مش هيسكت في اول جلسه هتلاقيه بيطلب اجل سواء للاطلاع او لتقديم المذكرات او تفاصيل تانية الي ان يحجز القاضي الدعوي للحكم وهنا بتروح تعرف الحكم ايه وتاخد صورة رسمية منه .
انت كمحامي بقي في بداية طريقك في اي مكتب محاماه .. الاستاذ هيحركك في الاول في الاعمال البسيطة زي :
تسليم واستلام الاعلانات :
وهي عمل روتيني جدا مش محتاج اكثر من انك تاخد من المكتب الاعلان وتعرف هو تابع لمحضرين اي منطقة .. وبتروح تسلمه لرئيس قلم المحضرين .. بيكتبلك عليه رقم وليكن : 48573 بتاريخ 18\7\2109 .. علشان لما تروح تستلمه بتسأل عليه بالرقم فقط ولو نسيت الرقم بتدور عليه بالتاريخ ولو اسمك مش علي الصحيفة بيكون معاك توكيل من الاستاذ المحامي بتستلمه به وبتمضي في الاجنده وتكتب رقم الكارنيه بتاعك .
معرفة القرارات :
وهي برده عمل روتيني بتعرف رقم الدعوي من المكتب وتروح للسكرتير بتلاقي عنده الاجندة بتفتحها بالتاريخ واليوم وتدور علي رقم الدعوي وهتلاقي جمبيها القرار ولو كانت الجلسة محجوزة للحكم فهتلاقي الاحكام في اخر الاجندة .. بتنقله وبتبلغ به الاستاذ المحامي اللي شغال معاه .
معرفة رقم الصادر والوارد :
ده بيكون رقم المحكمة بتصدر به ملف القضية لمحكمة تانية او للخبراء مثلا .. ولما بيوصل بياخد رقم تاني .. الاول بيكون صادر والثاني بيكون وارد .. لان اغلب المعاملات ده رسمية فلازم يكون في تسجيل في اجندة لبيان صحة استلام وتسليم الملفات بشكل يضمن الجدية ويعبر عن المسؤولية .. انت بتعرف الرقم علشان تعرف تتابع الاجراءات ماشية ازاي وايه اللي مفروض تعمله .
كتابة المذكرات :
في محامين كبار بيكون همه الاول انه يساعد المحامي المبتدئ انه يتعلم يكتب مذكرات علشان يفهم صحيح القانون .. ويخليه يبدأ يجمع اكبر حصيلة لغوية قانونية علشان تساعده فيما بعد .. الامر ده في غاية الاهمية ومفيد جدا .. وده طبعا بيكون في المكتب ..واعتقدها مهارة مهمة جدا لأي محامي كبر او صغر .. مش شرط تكون من إعداده ممكن تكون علي ورق وهو ينقلها فقط علي الكمبيوتر .
ولو انت نبيه شوية وباين عليك ذكي الاستاذ ممكن يحركك في :
حضور جلسه تطلب فيها اجل للاطلاع مثلا – ممكن يخليك تروح تعمل شهادة من واقع الجدول – شهادة بعدم حصول استئناف – تعرف اذا المتهم عارض في جنحة من عدمه – صورة رسمية من حكم – صورة ضوئية من ملف القضية – صورة من تحقيق نيابة وتفاصيل كتيير واجراءات ادارية كل ما تزيد خبرتك كل ما هتعرفها وتتقنها وتعرف هي في انهي مرحلة من مراحل التقاضي .
الكلام ده ممكن يكون بسيط للبعض لكنه مهم جدا لاي شخص ناوي ينزل في مكتب .. الحمد لله ربنا كرمنا بزملاء واساتذة لم يبخلوا علينا باي معلومة .. لو عايز تنجح في المحاماه نصيحة مني اوعي تبطل سؤال .. السؤال هو اللي هيعلمك بعد توفيق ربنا سبحانه وتعالي .
معلومة اخيرة :
امسك اي ملف قضية .. بص فيه كويس .. بص تاني
هتلاقي جواه الحاجات ده :
1- اصل الصحيفة
2- مذكرة دفاع
3- حافظة مستندات
4- الحكم
نصائح للمحامين المبتدئين …..
المحاماه خمس حاجات
” مظهر ، معلومة ، علاقات ، جراءة ، ثقة في النفس “
والمحامى لازم يبقى اجتماعى ومتكلم
أقرأ كتير فى صيغ الدعوى والعقود فى الاول وبعد كده شوية مذكرات دفاع ثم احكام المحاكم بالتفصيل على شوية كتب عن الادارى وكتب عن الإجراءات هتلاقى الدنيا بدأت توضح
خش بقى بعدها على العملى
هتلاقى نفسك بتقول الكلام ده انا قرأته فين قبل كده
اه كده المعلومة بدأت توضح
اعمل لنفسك تقرير يومى عن انجازاتك فى المحكمة
طيب وبعدين رتب بقى التقرير لكل قضية انت مشيت فيها ومتسبش ورقة الا لما تصورها نسخة ليك وكمان لازم تقرأها انت مش بوسطجى اه ولازم تقرأ عن موضوع الدعوى اللى انت شغال فيها يعنى لو شغال فى قضية نصب تجيب كتاب عن النصب وتقراه علشان يبقى بتربط بين العملى والنظرى وعلشان المعلومات تثبت وعلشان وانت شغال مفيش حاجة توقفك لانك هتكون ملم بهذه الطريقة
يعنى كده خطوات القضية كلها معاك
زى الفل طيب المكتب لو الشغل بيتعاد سيبه وشوف غيره علشان تبقى ملم بكل شئ جنايات ومدنى وتجارى وشرعي الافضل ان تدرب في اكثر من مكتب علشان توسع دائرة معارفك وعلاقتك وتكون ملم بكل الشغل
احضر جلسات واسمع مرافعات كتير وقيد الدفوع فى دفتر وانت جالس لتسمع المرافعات
ولازم تفكك من الشغل الادارى مش كل حاجه شغل ادارى فى حضور تحقيقات و جلسات محاكم تترافع فيها و لازم كتابة صحفية دعوة وكتابة مذكرات لازم تعمل القضية كامله واطلب كده ولو رفض سيبه وشوف غيره
اعمل لنفسك كل يوم قضية بروڤا وليكن هنشتغل جنحه ايصال اكتب خطواتها بايدك وعريضة دعوة لها ومذكرة دفاع لها من حيث الجانبي وهكذا وخليك عارف لو مقراتش كتير وبحثت واستخرجت وسألت على كل صغير وكبير لو معملتش كده هتفضل تابع لمكتب طول عمرك ومش هتتقدم واحب اقولك انت بوسطجى مش محامى
ومتنساش فى كل قضية انك تفكر بدماغ خصمك قبل ما تفكر لموكلك وانك تكون جاهز بالرد على جميع الادعاءات التى قد تثار لكى لا تتفاجا وتخسر القضية لأتفه الأسباب
طيب والعلاقات ابدا وسع دائرة معارفك
علشان تبقى شخصية عامة
أتعرف كل يوم على ناس جديدة يعنى تتعرف على اتنين او تلاته كل يوم و اقل شئ واحد جديد يخش دايرة علاقاتك اعتبرهم عملاء للمنتج اللى بتقدمه
بس لازم بردو تتابع القديم بالسؤال الناس هى مكسبك وثروتك واداه من ادوات نجاحك
سلم على الموظفين بايدك وهزر معاهم كده وصبح عليهم علشان تكسب محبه الناس وخليك خفيف الظل بس بحدود يعنى
تخلى حاجز زوجاجى فى علاقتك معاهم بردو
استغل دايرة معرفك واقاربك و المحيطين بك فى الترويج عن مجالك
المحامى باحث فى المقام الاول? ازى الكلام ده
يعنى زى الطلبة اللى بتعمل بحث وبتقدمه فى الجامعة
يعنى مطلوب منك تعمل بحث وتقدمه مش للدكتور فى الجامعة لا للدكتور اللى فى المحكمةيعنى القاضى والبحث هنا هو اللى اسمه مذكرة الدفاع أو صحيفة الدعوى او ما إلى ذلك
المحاماه بحر واسع والقوانين بتتغير كل يوم فى جديد يعنى لازم تقرا كتير ولو مش بتحب تقرا كتير يبقى شوف حاجة تانية اشتغل فيها واخر حاجة أقرأ ثم أقرأ اجعل كل يوم ساعة محدده للقراءة فى مجالك المحامي الشاطر هو الاكثر قراءة
و اصبر عليها اى حاجة فى أولها صعب
اتعب سنة او سنتين او اكتر هتحصد ثمرة التعب ده باقى السنين وكل ما تدرب وتقرأ اكتر هتكتسب خبرة اكتر وحب الشئ يهون عليك اى تعب..